Nakakaplag ang mga Japanese researchers og ebidensya sa epekto sa asteroid sa Hokkaido nga posibleng may kalabotan sa pagkahanaw sa mga dinosaur mga 66 milyon ka tuig na ang milabay.
Sumala sa pagtuon nga gipangulohan sa mga tigdukiduki gikan sa Tohoku University, University of Tokyo, ug Fukui Prefectural University, nakit-an nila ang usa ka layer sa bato sa Hokkaido nga adunay taas nga konsentrasyon sa platinum group elements usa ka timailhan nga kasagarang makita human sa asteroid impact.
Ang maong asteroid nga may diyametro nga 10–15 kilometros miigo sa Yuta duol sa karon nga Yucatán Peninsula. Giisip kini nga usa sa hinungdan sa kalit nga pagbag-o sa klima nga mitultol sa pagkahanaw sa mga dinosaur sa katapusan sa Cretaceous period.
Kini ang unang kumpirmadong ebidensya sa Japan nga adunay K–Pg boundary layer, nga nagtimaan sa maong dakong panghitabo sa kasaysayan sa Yuta.
Matod sa mga tigdukiduki, nakit-an usab nila nga adunay kulang nga bahin sa sediment layers nga posibleng nagrepresentar sa mga 30,000 ka tuig human sa impact.
Padayon pa ang ilang pagtuon aron mas masabtan kung giunsa gyud nahitabo ang pagkahanaw sa mga dinosaur ug kung giunsa pag-usab ang kinabuhi sa Yuta human sa maong katalagman.
Photo Courtesy: PNA
