Duha ka babayeng mabdos ang nadakpan human masikop sa usa ka buy-bust operation sa Purok 4, Barangay Patrocinio, Sta. Josefa, Agusan del Sur niadtong nakalabayng adlaw.
Ang hiniusang operasyon gihimo sa Philippine National Police pinaagi sa Sta. Josefa Municipal Police Station ug Agusan del Sur Police Provincial Office.
Ang mga nadakpan giila sa alyas nga “Madam”, 20-anyos, residente sa Monkayo, Davao de Oro, ug “Hannah”, 18-anyos, pareho nga mabdos ug residente sa maong lugar.
Sa operasyon, nakarekober ang kapulisan og tulo ka sachet nga gituohang shabu nga mitimbang og 13.15 gramos, nga adunay gibanabana nga kantidad nga hapit P90,000.
Nasakmit usab ang marked money nga gigamit sa transaksyon ug ang motorsiklo nga gigamit sa mga suspek.
Sumala sa kapulisan, ang duha ka babaye giila nga mga street-level drug personalities nga gituohang nag-apod-apod ug nagsuplay sa ilegal nga droga sa maong lungsod.
Karon, ang duha anaa na sa kustodiya sa kapulisan samtang gi-andam na usab ang kaso nga ipasa batok kani.
Photo courtesy: Sta. Josefa Municipal Police Station
