Gideklara sa World Health Organization (WHO) isip usa ka “public health emergency of international concern” ang outbreak sa Ebola didto sa Democratic Republic of Congo (DRC) ug Uganda.
Sumala sa WHO, ang outbreak gikan sa Bundibugyo virus apan dili pa kini matawag nga usa ka pandemic emergency.
Gipahayag sa ahensya sa panglawas sa UN nga hangtod niadtong Sabado, nakatala na sila og 80 ka mga gidudahang namatay, walo ka mga kaso nga kumpirmado sa laboratoryo, ug 246 ka mga gidudahang kaso sa probinsya sa Ituri sa Congo, lakip na sa mga dapit sa Bunia, Rwampara, ug Mongbwalu.
Una nang gipahibalo sa ministeryo sa panglawas sa DRC niadtong Biyernes nga 80 ka tawo na ang nangamatay sa bag-ong outbreak sa sidlakang bahin sa probinsya.
Didto usab sa Kampala, Uganda, nagtala ang WHO og duha ka kaso nga kumpirmado sa laboratoryo, lakip na ang usa ka namatay, gikan sa mga biyahero nga naggikan sa Congo apan walay kalabutan ang duha ka kaso sa usag usa, sumala pa sa WHO.
Aduna usab usa ka kaso nga kumpirmado sa laboratoryo sa Kinshasa, ang kapital sa Congo, gikan sa usa ka tawo nga mibiyahe balik gikan sa probinsya sa Ituri.
Photo courtesy: REUTERS/VICTOIRE MUKENGE
