Miubos og 8 porsyento ang ihap sa mga pasahero sa Cebu Pacific niadtong Abril ngadto sa 2.27 ka milyon kon itandi sa Marso. Sumala sa presidente ug chief commercial officer sa airline nga si Xander Lao, ang pagkunhod tungod sa mas taas nga pamaagi sa fuel surcharge nga giaprobahan sa Civil Aeronautics Board (CAB). Kini nga dugang bayad sa krudo nagdala og mas taas nga presyo sa tiket, hinungdan nga mibugnaw ang interes sa publiko sa pagbiyahe pinaagi sa ayroplano, ilabi na sa mga lokal nga biyahe nga nakasinati og pinakadakong pag-usos.
Sa ikaduhang bahin sa Abril, gipasaka sa CAB ang fuel surcharge ngadto sa Level 19, diin ang mga pasahero napugos sa pagbayad og dugang ₱627 hangtod ₱1,834 sa domestic flights, ug gikan ₱2,070.77 hangtod ₱15,397.15 alang sa international destinations. Bisan pa man niini, ang kinatibuk-ang dagan sa unang upat ka bulan sa tuig nagpakita gihapon og 6.2 porsyento nga pagsaka sa mga pasahero ngadto sa 9.81 ka milyon kumpara sa miaging tuig. Gipaubos na usab sa CAB ang bayad ngadto sa Level 15 alang sa ikaduhang bahin sa Mayo.
Aron madasig pag-usab ang publiko sa pagbiyahe, gipahayag ni Lao nga nagplano ang kompanya nga maglunsad og mga baratong seat sales ug usbon ang ilang mga presyo karong mosunod nga mga bulan. Target gihapon sa Cebu Pacific nga makakab-ot og 30 milyones ka mga pasahero karong tuiga. Kahinumduman usab nga nakatala og net loss nga ₱399.81 milyon ang kompanya sa unang kwarter sa tuig tungod sa pagkahuyang sa bili sa piso batok sa dolyar.
Photo courtesy: Philstar.com
