Target sa mga piskal sa International Criminal Court (ICC) nga sugdan sa Nobyembre 2026 ang pagdungog kang kanhi Pangulong Rodrigo Duterte may kalabutan sa mga kasong crimes against humanity sa panahon sa iyang administrasyon. Sa ilang report niadtong Mayo 15, gisugyot sa prosekusyon nga pormal nga sugdan ang husay sa Nobyembre 30, 2026, aron adunay igong panahon sa pag-andam sa mga dokumento ug ebidensya. Apan alang sa mga abogado sa mga biktima sa giyera kontra droga, mas maayo nga sugdan ang pagbista karon pa lang Setyembre aron mapaspas ang dagan sa hustisya ug makasalmot ang uban pang biktima.
Sa pikas bahin, gibalit-ad sa depensa ni Duterte ang isyu pinaagi sa pagpadayag sa nagkaluya nga panglawas sa kanhi pangulo. Matod sa iyang bag-ong abogado nga si Peter Haynes, kinahanglan nga usbon ang pagsusi sa medikal nga kondisyon ni Duterte aron masiguro kon kaya pa ba niini ang moatubang sa korte. Giduso sa depensa nga dili na sapat ang naunang medikal nga eksaminasyon nga gihimo sa sayong bahin sa kaso.
Kahinumduman nga niadtong Abril 23, gikompirma sa korte ang mga kaso batok kang Duterte human siya nadeklarar nga “fit to stand trial” o anaa sa saktong kondisyon nga muatubang sa husay base sa usa ka independente nga medikal nga pagsusi.
Sa pagkakaron, gibalhin na sa ICC ang kaso ngadto sa Trial Chamber III isip pagpangandam diin giatubang ni Duterte ang tulo ka ihap sa murder ug attempted murder tungod sa mga pagpamatay nga nahitabo sa dihang mayor pa siya sa Davao City ug sa iyang pagkapangulo sa nasod.
Photo courtesy: International Criminal Court
