Padayon ang paningkamot sa Department of Agriculture Region X sa pagtabang sa mga mag-uuma labi pa nga usa sila sa grabehang apektado sa padayong nasinating krisis sa lana.
Sumala pa ni Ferdinand Caraballe, Supervising Agriculturist, tungod ang agrikultura labing nagsalig sa mga input nga nakabase sa petrolyo sama sa abono ug pestisidyo, lakip na mga makinarya mas nagkataas ang ilahang galastuhon sa produksyon ug logistics.
Tuod, ning saka ang presyo sa bugas sa merkado, apan dili sab kini awtomatikong nagpasabot nga taas ang kita ug ginansya sa mga mag-uuma. Matod pa ni Caraballe, igo-igo ra ug halos malugi pa ang ubang mga mag-uuma.
Gawas sa mga ayuda, giduso sab sa DA ang paggamit og organic nga mga abono ug pestisidyo isip alternatibo sa mga imported aron nga makaminus sa galastuhon, lakip na ang pagsagol sa mga lokal nga bugas ngadto sa imported nga bugas aron nga dali mangahalin.
Giawhag sab ni Caraballe ang tanan sa pagdaginot tungod wala pay kasiguraduhan hangtud kanus-a masinati ang krisis ug taas nga presyo sa produktong petrolyo nga nakahatag og domino effects sa halos tanang batakang palaliton.
Photo courtesy: PhilRice
