Nagpahayag ang mga residente sa Zone 2B, Barangay Mambuaya sa syudad sa Cagayan de Oro nga andam silang mosunod sa legal nga proseso kalabot sa pagpahawa kanila basta hapsay ug uyon sa balaod ang pamaagi.
Matod ni Raisah Cabigon Macarambon, Vice President sa Hiduma Tribal Association, dili nila dawaton ang kalit nga demolition ilabina kung walay kamandoan gikan sa korte.
Kahinomduman nga nagkabinatoay ug nagkagubot tali sa mga residente ug demolition team sa miaging adlaw human wala masabti sa mga nagpuyo sa lugar ang kalit nga pagpahawa kanila sa dapit.
Gitakda usab karong umaabot nga Huwebes ang dayalogo tali sa mga residente, barangay officials ug claimant aron mahapsay ang sitwasyon ug malikayan ang paglapas sa katungod sa matag panig.
