Mipirma ang Department of Trade and Industry (DTI) ug ang Dakbayan sa Sugbo og usa Memorandum of Agreement alang sa dungan nga pag-abli sa ika-40 nga Negosyo Center sa Lalawigan sa Sugbo ug pagsugod sa unang hugna sa DTI Financing Caravan, usa ka programa sa pagsuporta sa mga negosyo nga gitumong sa pagsumpay sa mga micro, small, and medium enterprises (MSMEs) ngadto sa mga oportunidad sa pagpahulam ug giya nga ilang gikinahanglan aron makabangon ug motubo pag-usab.
Ang Negosyo Center anaa sulod sa One Stop Shop sa Robinsons Galleria aron mahimong sayon nga dapit alang sa mga lokal nga negosyante sa pagpangayo og tabang sa business registration, business counseling, ug pag-access sa mga programa sa gobyerno.
Ang dakbayan sa Sugbo maoy unang lokalidad nga gipuy-an sa Financing Caravan nga gilauman usab nga moabot sa ubang mga lugar sa mosunod nga mga bulan.
Pinaagi sa Caravan, ang MSMEs makadawat og nagkadaiyang serbisyo ubos sa usa ka atop sama sa mga oportunidad sa loan ug financing, financial literacy ug negosyo guidance, business support ug konsultasyon, ug digital payment solutions alang sa ilang mga negosyo.
Ang inisyatiba adunay dugang nga panan-awon alang sa umaabot. Gipadayag sa mga opisyal sa Cebu City ang ilang paglaum nga motakdo ang DTI sa 2035 Vision sa dakbayan pinaagi sa pagpalambo sa ease of doing business gamit ang digital registration processes, paghingusog sa green financing ug sustainable sourcing isip suporta sa circular economy, ug pagtabang sa mga aspiring entrepreneurs nga mobalhin gikan sa informal ngadto sa formal sector.
