Mopahigayon ang Mactan Fighting League (MFL) sa ilang unang combat sports event karong Mayo 31 sa Vaño Beach Resort sa Barangay Marigondon syudad sa Lapu-Lapu.
Matod ni MFL promoter Lica Noynay, tumong sa liga ang paghatag og plataporma sa mga batan-ong manan-away ug atleta aron mapakita ang ilang talento ug makaangkon og oportunidad nga makaabot sa internasyonal nga entablado.
Sumala ni coach Danzle Tulod, ang maong kalihukan maglangkob og kapin sa 20 ka sangka sa Muay Thai, kickboxing, boxing, ug pencak silat.
Manguna sa main event sa Super Muay Thai si Christian Belarmino sa Atlas Muay Thai Fitness kontra ni Anthon Rey Divinagracia sa Lapu-Lapu Striker.Lakip usab sila Lyndon Pescador batok ni Jeran Ellecion, Kim Bisbal kontra ni Rex Generale, ug Romel Senador batok ni Shindler de los Santos.
Sa kickboxing, makigsangka si Michael Rebayos ni Isaac de la Cruz samtang si Nathaniel Lanza makig-atbang ni July Salatan. Apil usab sa Super Kickboxing card si Renan Noblefranca kontra ni Jeson Marangga ug si Bon Philip Latonio batok ni Johnver Espra.
Sa boxing, magtigi sila Hanz Quilaton ug Kirby Hoybia, samtang si Vince Russel Dayondon makigbugno ni Kenneth Toledo.
