Gisuotan og virtual reality (VR) headsets ang mga baka sa usa ka umahan sa Russia sa tinguha nga mamenosan ang ilang stress ug mapalambo ang produksyon sa gatas.
Ang maong mga baka gipasuotan og mga VR system nga espesyal nga gidisenyo base sa porma sa ulo sa baka. Sulod sa headset, gipakita kanila ang usa ka “unique summer field simulation program” o usa ka virtual nga sibsibanan nga hayag ug malinawon ang palibot.
Sumala sa Ministry of Agriculture and Food sa Moscow, gibase nila kini sa mga pagtuon nga nagpakita sa direktang koneksyon tali sa emosyonal nga kahimtang sa baka ug sa gidaghanon sa gatas nga magama niini.
Sa unang hugna sa gihimong testing sa RusMoloko farm sa distrito sa Ramensky, namatikdan sa mga researcher ang mosunod, Misaka ang kinatibuk-ang “emotional mood” sa tibuok pundok sa baka.
Sumala pa, Miubos ang lebel sa anxiety sa mga mananap samtang naggamit sa teknolohiya. Dugang pa, ang malinawon nga palibot makatabang gayod sa pagsaka sa kalidad ug gidaghanon sa gatas.
Gikatakdang ipadayon sa mga researcher ang pagtuon aron makita ang long-term nga epekto sa VR program. Kon magpadayon ang maayong resulta, plano sa mga developer nga palapdan pa ang proyekto sa uban pang mga farm sa nasod.
Niining bag-ong lakang sa teknolohiya, gilauman nga mahimong sumbanan ang maong proyekto alang sa modernong pagpanguma. Pinaagi sa pagsagop sa “high-tech” nga pamaagi aron mahatagan og kalinaw sa huna-huna ang mga mananap, gipamatud-an sa mga eksperto nga ang kaayohan sa mga hayop adunay direktang epekto sa ekonomiya ug sa kalidad sa pagkaon nga makuha sa mga konsumidor.
Photo Courtesy: Ignite your mind
