IP COMMUNITIES GIPILI ANG KALINAW: “MAGHAT” TRIBAL CONFLICT NASULBAD PINAAGI SA TAMPUDA PEACE AGREEMENT

Opisyal nang nasulbad ang dugay nang panagbangi sa mga Indigenous Peoples (IP) nga nailhan isip “Maghat” tribal conflict, atol sa usa ka settlement conference nga gihimo sa Barangay Namnam kaniadtong Mayo 15, 2026.

Human sa tulo ka bulan nga padayon nga dayalogo ug panag-uli ang kasabotan nagtimaan og dakong lakang padulong sa panaghiusa ug kalinaw sa mga komunidad nga naglangkob sa tri-boundary area sa Talaingod ug Kapalong sa Davao del Norte, ug San Fernando sa Bukidnon.

Gipangulohan ni Datu Julio Alub, Chieftain sa Kalagangan Tribal Officials, ang proseso sa pagpasig-uli. Gihatagan niya og gibug-aton ang kahinungdanon sa pagpasaylo, panaghiusa, ug pag-ayo sa relasyon sa mga pamilya ug tribo nga dugay nang nagbahinbahin.

Gipakita usab sa komperensya ang pagdawat sa pamilya sa biktima sa kasabotan, diin naapil ang pinansyal nga tabang ug panginabuhian nga suporta. Ang simbolikong pakiglamano sa mga lider tribo, lokal nga opisyal, ug pamilya sa biktima nagpamatuod sa tinuoray nga panag-uli ug pagrespeto sa usag usa.

Sa pahayag sa Probinsya sa Davao del Norte, pinaagi ni Atty. Ralph Dela Cruz nga nagrepresentar kang Gobernador Edwin Jubahib, gipasalig ang padayon nga suporta sa pamilya sa biktima pinaagi sa scholarship ug ubang programa sa tabang.
Samtang, gipasiugda ni San Fernando Mayor Rogelio C. Yeke ang kahinungdanon sa paggiya sa mga lumad aron mapreserbar ang ilang kultura ug tradisyon nga nagpalig-on sa identidad ug panaghiusa. Matud niya, ang tinuod nga kalamboan makab-ot lamang kung ang kultura ug kalinaw magtinabangay.

Gikonsiderar nga usa ka milestone ang kalihukan nga natapos pinaagi sa kasabotan nga ipahigayon ang Tampuda Ceremony sa Mayo 28, 2026, dungan sa ika-2 nga anibersaryo sa Insurgency-Free Declaration sa San Fernando.

Ang Tampuda usa ka tradisyonal nga ritwal sa kalinaw nga naglig-on sa panag-uli ug pasalig sa malinawon nga kaugmaon sa tanang partido

Photo Courtesy: Mayor Rogelio C. Yeke