Usa ka pasahero ang hinungdan sa wala damha nga paghunong sa usa ka international flight sa Qantas human kuno namaak og flight attendant atol sa biyahe paingon sa Estados Unidos.
Ang eroplano nga gikan sa Melbourne, Australia padulong unta sa Dallas, USA napugos og landing sa Papeete, French Polynesia tungod sa gubot nga gihimo sa maong pasahero.
Sumala sa local media reports, nasuko ug wala na makontrol ang lalaki hangtod nakaabot sa punto nga napaakan pa niya ang usa ka flight attendant. Tungod niini, wala nay choice ang piloto kundili ang pag divert sa flight aron masiguro ang kaluwasan sa ubang pasahero ug crew.
Wala pa gipadayag sa mga otoridad ang tinuod nga hinungdan nganong nasuko ang pasahero, apan daghang netizens ang nangatawa ug nangomento nga “murag nahimong zombie movie” ang nahitabo sulod sa eroplano.
Ang uban pud nagkomedya nga basin wala matagai og extra peanuts o dili ganahan sa inflight meal maong nahitabo ang “biting incident”.
Sa pagkakaron, giatiman sa mga otoridad sa French Polynesia ang maong pasahero samtang gipadayon usab sa Qantas ang imbestigasyon sa insidente. Walay laing pasahero ang naangol sa maong panghitabo.
Photo courtesy: Sustainability Online
