Gipatin-aw sa Catholic Bishops’ Conference of the Philippines nga dili pag-atake sa mga politiko ang tumong sa ilang mga pastoral statement, kondili paggiya sa katawhan ug pagpahimangno sa mga isyu nga ilang nakita nga dili na angay sa moralidad ug maayong pamatasan sa gobyerno.
Matod ni Fr. Jerome Secillano, ang bag-ohay nga pahayag sa Simbahan kabahin sa kalit nga pag-ilis sa liderato sa Senado gihimo aron masabtan sa publiko ang nagakahitabo, ug dili aron dauton ang imahe sa mga opisyal sa gobyerno.
Dugang niya, daghan sa kasamtangang panghitabo sa politika ang mas nagpakita og partisan politics kaysa tinuod nga pagserbisyo sa katawhan.
Sa laing bahin, mibatikos usab si Socrates Villegas sa kalit nga pagbag-o sa liderato sa Senado diin napulihan si Vicente Sotto III ni Alan Peter Cayetano isip Senate President.
Sa iyang pastoral letter, gihulagway ni Villegas nga “makalilisang” ug “makapakaulaw” ang maong lihok sa pipila ka mga opisyal nga gitawag og “honorable,” samtang nangutana usab siya kon ngano nga nakaabot sa ingon nianang ubos nga lebel ang serbisyo publiko sa gobyerno.
Photo Courtesy: Catholink
