Gipahimangno sa Fitch Solutions unit nga BMI Research nga posibleng magpabilin nga taas ang political risks sa Philippines tungod sa nagkadugang nga kabalaka sa publiko bahin sa kakulang sa accountability sa pipila ka mga senior officials, nga posibleng makapahuyang sa pagsalig sa mga institusyon sa gobyerno.
Sa ilang report, giingon sa BMI nga samtang ang krisis sa Middle East nagpabilin nga usa sa mga hinungdan sa pagtaas sa social ug political risks, ang internal nga tensyon sa politika sa Pilipinas—ilabi na ang impeachment case ni Sara Duterte—nagadugang usab sa kagubot sa opinyon sa publiko.
Matod sa report, ang “pagkakita sa posibleng iregularidad o kakulang sa hustong panubag sa mga opisyal” mahimong makapahuyang sa kredibilidad sa mga imbestigasyon sa korapsyon, nga magpabilin nga taas ang political risk sa nasud.
Gipakita usab sa analysis nga nagkataas ang Rule of Law indicator sa Political Risk Index sa Pilipinas, nga nagpasabot sa posibleng paghinay sa accountability ug pagtaas sa kahuyang sa mga institusyon.
Ang report gipagawas duha ka adlaw human sa insidente sa Senado diin adunay pagpamusil sulod sa premises, nga misangpot sa lockdown human madawat ang Articles of Impeachment batok kang Sara Duterte.
Gipahimangno usab sa report nga kung ang Senado dili mopadayon sa husto ug patas nga impeachment trial, mahimo kini magdala og dugang nga politikal nga panagbangi sa nasud.
Photo Courtesy: LinkedIn
