Nakurat ug nalisang ang usa ka barangay tanod sa Zone 1, Digos City human giitsa-han og MK-2 fragmentation grenade samtang nagpatrolya sa daplin sa Caños Digos River pasado kadlawon sa Mayo 17,2026. Giila ang tanod nga si Ali Kasan nga matod pa nakasugat og tulo ka mga persona samtang nagsubay sa sementadong bahin sa river control.
Sa kalit lang, adunay giitsang butang paingon sa iyang direksyon nga iyang gihuna-huna una nga bato lamang. Apan sa dihang iyang nasuta nga granada diay kini, daling miambak ang tanod ngadto sa river control tungod sa kahadlok nga basin mobuto ang maong explosive.
Maswerte hinuon kay wala mibuto ang granada human nasayran nga wala diay matangtang ang safety pin niini. Dayon kining gi-report ngadto kang Barangay Zone 1 Kapitan Jay Medina nga maoy mitawag sa mga personahe sa Explosive Ordnance Disposal o EOD aron sa hustong pagdumala ug disposal sa granada.
