Nasinatian sa mga residente sa lungsod sa General Salipada K. Pendatun, Maguindanao del Sur ang 5.2 magnitude nga linog niadtong milabay’ng Sabado, Mayo 16, 2026, pasado alas 7 sa gabie, kung asa, nakapabati og kahadlok sa pipila ka residente sa nagkadaiyang lugar sa Mindanao.
Sumala sa report, nabati ang Intensity 4 sa Lutayan, samtang Intensity III sa Palimbang nga parehong sakup sa Sultan Kudarat.
Narekord usab ang Intensity II sa Magpet, Antipas ug Kidapawan City. Sa instrumental intensities, miabot sa Intensity V ang M’lang ug President Quirino, Sultan Kudarat, samtang Intensity 4 sa ubang lugar sama sa Koronadal City ug sa mga kasikbit nga lungsod.
Nabatian usab ang Intensity III sa ubang bahin sa Mindanao, lakip ang Digos City ug uban pang kalungsoran.
Bisan pa sa kusog sa linog, wala pay naitalang dakong kadaot o nasamdan, apan padayon ang pagbantay sa mga otoridad tungod sa posibleng aftershocks, samtang ginadasig ang publiko nga magpabiling alerto ug andam.
Photo Courtesy: Phivolcs-DOST
