Nagpabiling lig-og ang kampanya sa TNT Tropang 5G human nila mapildi ang top-seeded NLEX Road Warriors, sa score nga 96-93, sa unang duwa sa quarterfinals sa PBA Commissioner’s Cup nga gihimo sa Ninoy Aquino Stadium.
Bisan sa dehado nga kahimtang isip number 8 seed kontra sa twice-to-beat nga NLEX, nagpakita og kalig-on ug determinasyon ang TNT aron mapugngan ang ilang sayong kapildihan sa playoffs.
Nakahatag ug dugang kusog sa Tropa si import Bol Bol, nga mipuntos og 34 points, 14 rebounds ug tulo ka blocks. Dako usab og natabang sila RR Pogoy, Calvin Oftana ug veteranong si Jayson Castro aron maselyohan ang importanteng kadaugan sa TNT.
Nakab-ot usab ni Castro ang personal milestone human mosulod sa elite 10,000-point club sa PBA pinaagi sa iyang 14 puntos sa maong duwa.
Nakapuntos usab si Oftana og 19 samtang si Pogoy adunay 15 puntos ug maayong depensa batok kang NLEX gunner Robert Bolick nga natapos lang og 15 puntos sa wala pa ma-foul out.
Segon ni TNT head coach Chot Reyes, dugay na nilang giandaman ang posibilidad nga kinahanglan nilang pildihon kaduha ang usa ka team aron makasulod sa sunod nga hugna.
Tungod sa maong resulta, mapugos karon sa do-or-die Game 2 ang TNT ug NLEX karong Sabado aron mailhan kung kinsa ang mosulod sa semifinals.
Photo Courtesy: PBA NEWS/ BASKETBALL SAGA
