Gilusad sa Pasig River Ferry Service (PRFS) ang ilang mga bangka og libreng WiFi alang sa mga pasahero niini pinaagi sa pakigtambayayong sa Department of Information and Communications Technology (DICT). Ang serbisyo gituyo aron madani ang publiko sa pagsakay sa lantsa, matod ni Metropolitan Manila Development Authority (MMDA) Chair Romando “Don” Artes, atol sa paglusad sa serbisyo sa San Joaquin Ferry Station sa Pasig niadtong Huwebes.
Ang programa kabahin sa Free Public Internet Access Program (FPIAP) sa DICT, diin ang matag ferry station ug bangka makahatag ug maximum connection speeds nga 40 ngadto sa 60 Mbps, o 10 ngadto sa 20 Mbps atol sa rush hours. Kauban ni Artes sa paglusad sila si DICT Secretary Henry Aguda, Pasig City Mayor Vico Sotto, ug Pasig House Rep. Roman Romulo.
Aron mapauswag pa ang PRFS, matod niya, daghang mga electric ferry boats ang magamit, dugang sa daghang mga istasyon sa lantsa. Sa pikas bahin, gipasiugda ni Aguda ang kamahinungdanon sa koneksyon sa mga pasilidad sa transportasyon aron mahatagan ang dugang nga access sa mga oportunidad ug kasayuran.
Sa pagkakaron, adunay libreng WiFi sa mga ferry station sa Lambingan, Polytechnic University of the Philippines (PUP), Sta. Ana, Maybunga, Pinagbuhatan, San Joaquin, Hulo, Valenzuela, Kalawaan, Guadalupe, Quinta, ug Escolta.
Photo Courtesy: PIA
