Gipalapdan karon sa Philippine Health Insurance Corporation (PhilHealth)sa Northern Mindanao ang ilang Outpatient Emergency Care Benefit (OECB)Package ngadto sa mas daghang tambalanan sa rehiyon.
Kini aron maubsan ang gasto sa mga pasyente nga nagkinahanglan og dinalian o emergency nga pag atiman.
Matod ni PhilHealth Regional Vice President Delio Aseron II, kini nga lakang nahiuyon sa kamanduan ni Presidente Ferdinand Marcos Jr. sa pagpalapad sa serbisyong panglawas alang sa mga Pilipino.
Ubos sa PhilHealth Circular No. 2025-0020, sakop sa benepisyo ang mga pasyente nga kalit ug grabe ang kondisyon nga daling giatiman ug gipapauli sulod sa 24 oras gikan sa emergency room. Malikayan na usab niini ang sayop nga pagtuo nga magamit lang ang PhilHealth kon ma-confine o ma-admit sa ospital.
Lakip sa package ang fixed rates alang sa 342 ka mga serbisyong medikal, lakip na ang X-ray, CT scan, laboratory tests, ug mga tambal.
Mamahimong mapahimuslan sa tanang rehistradong miyembro sa PhilHealth ang benepisyo, ug kadtong wala pa marehistro mahimong mag-enroll pinaagi sa eGov App o sa PhilHealth Member Portal diha mismo sa ospital.
Photo courtesy: Philhealth X
