Kung abi ninyo nga ang pinakakatingad-ang pulotan kay chicharon ug dried fish, aw lahi ra gyud sa Japan human nahimong patok didto ang crackers nga adunay sulod nga mga patay ug uga nga tambuboan.
Gitawag kini og “Jibachi Senbei,” usa ka klase sa savory crackers nga naimbento sa syudad sa Omachi sa Japan. Ang kakaiba ani, tinuod gyud nga tambuboan ang gisagol sa crackers—dili flavoring, dili drawing, kundili tinuod nga insekto nga gilat-an, giuga ug gisagol sa minasa.
Ang maong snack gihimo sa usa ka grupo sa senior citizens nga mahilig mangdakop og digger wasps sa lasang. Human nila dakpon, ilang pabukalan ug paugaon ang mga tambuboan before ihatag sa panadero aron himuong crackers.
Matod sa mga nakatilaw, medyo tam-is ang crackers apan ang lasa sa uga nga tambuboan kuno murag sunog nga pasas. Samtang ang baho sa pag-abli sa pakete, gihulagway nga pareho sa fish food.
Bisan pa niini, daghan gihapon ang nacurious ug mobiyahe pa ngadto sa Omachi aron sulayan ang maong snack nga giingong taas usab og protein content.
Ug samtang ang uban nangita og chocolate ug cookies, naa sab diay mga tawo nga nalipay sa crackers nga posibleng makapahinumdom nimo sa imong kahadlok sa tambuboan.
Photo courtesy: Oddity Central
