Nakadani og dakong atensyon sa Kenya ug sa social media ang usa ka 27-anyos nga lalaki nga gibansagang “Birdman” tungod sa iyang talagsaong pag-atiman ug pagsagop sa mga ihalas nga langgam.
Ang lalaki giila nga si Rogers Olu Maguta nga kasagarang makita nga naglakaw sa kadalanan sa Nairobi uban sa daghang langgam nga nagtugdon sa iyang ulo ug mga abaga.
Bisan nagkinabuhi nga walay permanenteng puloy-anan, gigahin ni Rogers ang kadaghanan sa iyang oras sa pag-atiman sa mga samdan ug luya nga langgam hangtod makabalik kini sa kalasangan. Matod pa kaniya, bisan gamay ra ang iyang pagkaon, andam gihapon siyang makigbahin niini sa mga langgam nga iyang giatiman.
Nailhan siya isip “Nairobi Birdman” ug misikat ilabina niadtong 2025 atol sa mga protesta sa Nairobi diin daghan ang nakapansin sa iyang talagsaong panagway. Apan, nahimo usab siyang sentro sa kontrobersiya human giingong gikulata sa kapulisan gamit ang baton atol sa kagubot.
Sumala sa report, sukad pa sa iyang pagkabata mahiligon na si Rogers sa mga langgam ug pirming moadto sa Lake Nakuru National Park aron motan-aw sa flamingo, stork ug black kites.
Nausab ang iyang kinabuhi lima ka tuig na ang milabay sa dihang usa ka samdan nga langgam ang miduol kaniya ug iyang gitabangan. Ginganlan niya kini og Johnson ug sukad niadto nagsugod na siyang moatiman ug uban pang mga langgam nga gidala sa mga tawo ngadto kaniya.
Bisan walay pormal nga training, nakatabang siya sa daghang klase sa langgam gikan sa kapin 20 ka species ug ang uban niini nagpabilin nga iyang kauban.
Pinaagi sa iyang mga video sa social media sama sa TikTok, Instagram ug Facebook, gusto ni Rogers nga mahimong inspirasyon sa uban sa pag-amuma sa kinaiyahan ug mga mananap.
Photo Courtesy: AL J azeera
