Misalmot isip “valued partners” ang walo ka nasud sa Luzon Economic Corridor o LEC initiative, samtang gipalig-on pag-usab sa Pilipinas, Japan ug Estados Unidos ang ilang kooperasyon alang sa paspas nga infrastructure development ug economic connectivity sa nasud.
Sumala sa Japanese Embassy sa Pilipinas, atol sa ika-upat nga LEC Steering Committee meeting sa Makati niadtong Mayo 12, opisyal nga miapil isip partners ang Australia, Canada, Denmark, France, Italy, South Korea, Sweden ug United Kingdom.
Matod ni Endo Kazuya, pinaagi sa panagtambayayong sa Pilipinas, US ug ubang partner countries, mapaspasan ang economic growth ug connectivity sa nasud.
Gihisgutan usab sa miting ang progreso sa mga proyekto ug mga hagit nga giatubang sa mga investors sa Pilipinas.
Giingon sa Japan nga nakahatag na sila og konkretong kontribusyon sa transportasyon, enerhiya ug digital technology.
Ang Luzon Economic Corridor gilusad niadtong 2024 sa Pilipinas, Japan ug Estados Unidos isip kabahin sa Partnership for Global Infrastructure and Investment aron mapalig-on ang dagkong infrastructure projects sa Luzon.
PHOTO COURTESY: REMATE
