Dakpan sa Surigao del Sur Police Provincial Office ang Top 2 Most Wanted Person sa provincial level atol sa usa ka intelligence-driven operation, Mayo 14, 2026.
Ubos sa pagpanguna ni Provincial Director Jeffrey Lawrence D Mauricio, nasikop ang suspek nga nailhang alias “Miggy,” 20-anyos, residente sa Marihatag ug giingong miyembro sa CTG ubos sa ROC, NEMRC.
Sumala sa report, si alias “Miggy” usa sa mga naangol sa engkwentro nga nahitabo niadtong Mayo 11, 2026 ug nasutaang confined sa Adela Serra Ty Memorial Medical Center sa Brgy. Telaje, Tandag City.
Bandang alas 2:45 sa hapon, gipahigayon ang operasyon sa mga personnel sa 2nd Surigao del Sur Provincial Mobile Force Company ubos sa superbisyon ni PLTCOL Nelson C. Nelmida uban sa Provincial Intelligence Unit.
Ang pagdakop gihimo pinaagi sa Warrant of Arrest alang sa kasong Murder ubos sa Article 248 sa Revised Penal Code. Ang warrant, nga walay piyansa, giisyu niadtong Hunyo 2, 2025, sa Regional Trial Court, Branch 28, Lianga, Surigao del Sur.
Gipahibalo sa mga otoridad ang suspek sa iyang mga katungod ubos sa balaod samtang padayon siyang gitambalan sa ospital. Nagdeploy usab og personnel ang 2nd SDSPMFC aron siguruhon ang higpit nga pagbantay ug seguridad sa suspetsado samtang naghulat sa hustong disposisyon sa kaso.
Photo courtesy: SDSPPO
