Dakpan ang duha ka armadong lalaki atol sa gipahigayong checkpoint operation sa Bislig City, Mayo 13, 2026. Ubos sa pagpanguna ni Provincial Director Jeffrey Lawrence D Mauricio, nagpatuman og “Oplan Bakal Sita” ang kapulisan sa Bislig City Component Police Station ubos sa superbisyon ni PLTCOL Jassen N Tuario sa Purok 3, Don Bosco, Brgy. Mangagoy, alas 1:05 sa kadlawon.
Atol sa operasyon, gipara sa mga pulis ang usa ka itom nga Honda XLR motorcycle nga walay plaka nga gisakyan sa duha ka indibidwal nga nailhang sila alias “Jun2x” ug alias “Jo-jo,” parehong 40-anyos, mag-uuma ug residente sa Bislig City.
Sa inspeksyon, narekober gikan sa mga suspek ang usa ka silver nga .45 caliber Colt Government Model pistol nga adunay lima ka bala ug usa ka .22 magnum “Black Widow” mini-revolver nga puno usab sa lima ka live ammunition.
Gawas sa mga armas, nakuha usab sa kapulisan ang usa ka heat-sealed sachet nga gituohang shabu nga adunay gibanabang street value nga P3,400, usa ka glass tube nga adunay uga nga dahon sa marijuana, ug lain-laing drug paraphernalia sama sa glass pipes, aluminum foil strips, ug improvised tooters.
Gipahibalo sa mga pulis ang mga nadakpan sa ilang katungod ubos sa Miranda Doctrine ug Anti-Torture Act ug sila gidala sa Bislig CCPS uban sa mga ebidensya alang sa hustong dokumentasyon ug disposisyon.
Nag-atubang karon ang duha ka suspek og mga kaso kalabot sa paglapas sa Republic Act 10591 o illegal possession of firearms ug Republic Act 9165 o Comprehensive Dangerous Drugs Act.
Photo courtesy: SDSPPO
