Gikumpirma sa tag-iya sa experimental solar-powered aircraft nga Solar Impulse 2 nga nahagsa kini bag-ohay lang sa Gulf of Mexico human sa usa ka test flight.
Ang Solar Impulse 2 naila sa kasaysayan tungod sa paglibot niini sa kalibutan niadtong 2016, diin milupad kini og 26,700 ka milya (43,000 kilometros) sulod sa 17 ka yugto (stages) nga wala naggamit og bisan unsang jet fuel.
Gipalupad kini kaniadto sa mga Swiss pilots nga silang Bertrand Piccard ug André Borschberg, ug nahimong labing unang eroplano nga nakalibot sa kalibutan gamit lamang ang kusog sa adlaw o solar power.
Sumala sa Skydweller Aero, ang kompanya nga nipalit sa ayroplano tulo ka tuig human sa world tour ug gihimo kining usa ka drone, nilupad ang Solar Impulse 2 gikan sa Stennis, Mississippi niadtong Abril 26 ug nahagsa sa Gulf of Mexico niadtong Mayo 4.
Gisaysay usab nga gigamit ang ayroplano sa usa ka US Navy exercise sa wala pa ang insidente. Padayon pa karon nga giimbestigahan sa US National Transportation Safety Board (NTSB) ang hinungdan sa pagkahagsa sa solar-powered aircraft.
Photo courtesy: PV Magazine
