Gisusi na karon sa National Bureau of Investigation (NBI) ug Philippine National Police (PNP) ang posibilidad nga “staged” o duna bay nahitabong sabut-sabut sa insidente sulod sa Senado.
Nagdumili ang NBI sa pagkumpirma sa espekulasyon ug gipasabot nga kabahin pa kini sa nagpadayong imbestigasyon.
Matod ni NBI Director Melvin Matibag, nakatutok ang ilang pagsusi sa mga factual evidence samtang nakig-alayon ang PNP sa pag-imbestiga sa 20 ka mga personalidad nga anaa sa dapit. Kasamtangang gisusi sa mga awtoridad ang mga kuha sa CCTV ug mga basyo sa bala nga narekober.
Gihatagan og gibug-aton ni Matibag nga dili pa sila mahimong magpagula og bisan unsang konklusyon samtang nagpadayon ang imbestigasyon, apan gipasalig niya nga ipahibalo ang resulta sa higayon nga mahuman na kini.
Gikumpirma usab ni PNP Chief Lt. Gen. Melencio Nartatez Jr. nga ang NBI ang nanguna sa imbestigasyon. Sa pagkakaron, giila na sa mga awtoridad ang mga indibidwal nga dunay bitbit nga armas ug ang mga nakatalagang security forces sulod sa Senado.
Lakip sa mga gipailalom sa accounting mao ang mga personahe gikan sa Office of the Sergeant-at-Arms (OSAA) Security, Police Security and Protection Group (PSPG), ug Armed Forces of the Philippines (AFP), partikular na ang mga sakop sa Philippine Marines.
Ikompara sa mga imbestigador ang mga pamahayag sa mga saksi ngadto sa mga pisikal nga ebidensya nga nakuha, lakip ang mga basyo sa bala ug ang mga kuha gikan sa CCTV footage sa dapit.
Photo courtesy: Presidente Communication Office
