Gihangyo karon ni Konsehal Marlo Tabac ang mga kaubanang konsehal ilawom sa Committee on Trade and Commerce ug Committee on Agriculture nga paspasan ang paglihok sa pagmugna og Memorandum of Agreement kalabot na sa pagbaligya sa syudad og P20 per kilo nga bugas.
Pagpasabot ni Konsehal Tabac, kinsa ABC President ug chairman sab sa Committee on Barangay Affairs, nga tumong sa Memorandum of Agreement tali sa lokal nga panggamhanan sa Cagayan de Oro ug sa Natioanl Food Authority ug Food Terminal Incorporated nga makapalit ang syudad og baynte pesos nga bugas aron nga didto na sa kabarangayan ipangbaligya.
Saysay pa ni Tabac, dakong alibyo kini sa tao labi pa nga taas ang presyo sa palaliton sama sa bugas. Dili na sab mahasol ang mga tao nga mupila sa bodega sa NFA taliwala sa grabeng kainit nga panahon.
Gipasalig sab sa mga hingtungdang komitiba nga ilaha kining hatagan og saktong pagtagad.
Photo courtesy: NFA Misamis Oriental
