Nasakmit sa Philippines ang bag-ong titulo sa Guinness World Records alang sa pinakadaghang water lanterns nga gipapalutaw sa usa ka kalihukan human molutaw ang 11,016 ka parol sa usa ka artipisyal nga lawa sa Pampanga.
Nahimo ang record attempt atol sa Lumina Water Lantern and Music Festival diin liboan ka mga ticket-holder ang nagpasiga ug nagpalutaw sa mga paper lanterns. Nalabwan niini ang target nga 10 mil ka lanterns ug opisyal nga gikumpirmar ang rekord ni Emi Saito nga gipadala isip adjudicator sa maong organisasyon.
Ang mga lantern gihimo gikan sa papel ug gibutang sa mga kahoy nga floaters uban sa gamayng LED lights. Milutaw kini sulod sa kapin lima ka minuto isip kabahin sa dakong visual display nga giorganisar sa Vibe Events Management Corp. ug The Lakeshore.
Sumala sa mga lokal nga opisyal, ang bag-ong world record nagpakita usab sa dugay nang tradisyon sa Pampanga sa paghimo og mga parol, lakip ang handcrafted lanterns ug ang bantugang Giant Lantern Festival nga magselebrar sa ika-118 ka tuig karong Disyembre.
Ang kalihukan gihimo sa usa ka 12-ektaryang lawa sulod sa The Lakeshore, usa ka 300-ektaryang residential ug recreational development nga gitukod kapin 26 ka tuig na ang milabay.
Matud pa ni James Madrid, giapil usab sa kalihukan ang environmental measures sama sa cleanup, disposal, recycling, ug uban pang eco-friendly nga mga inisyatiba aron malikayan ang kadaot sa palibot
Photo Courtesy:www.vibeeventsph.com
