Gisiguro sa Philippine Rural Electric Cooperatives Association (PHILRECA) nga andam ang tanang electric cooperative sa tibuok nasod sa pagsunod sa direktiba nga temporaryong dili magpatuman og disconnection sa mga konsyumer sa kuryente.
Kini human sa mando sa Energy Regulatory Commission (ERC) nga suspindihon sa temporaryo ang disconnection sa konsumo sa kuryente gikan Mayo hangtod Hunyo.
Sumala ni PHILRECA Executive Director Atty. Janeene Depay-Colingan, dili na bag-o sa mga electric cooperative ang maong sitwasyon kay nasinati na kini sa panahon sa COVID-19 pandemic ug sa uban pang kalamidad, diin giusab-usab usab ang schedule sa bayad imbes nga putlon dayon ang serbisyo.
Giingon usab nga ang 111 ka electric cooperatives sa tibuok Pilipinas nagpatuman na og “utay-utay nga pagbayad” alang sa mga konsyumer nga mokonsumo og hangtod 200 kWh, isip tabang sa mga pamilyang naapektuhan sa kasamtangang kahimtang sa ekonomiya.
Ang maong direktiba sa ERC gipatuman sa tunga sa nagpadayon nga pagsaka sa presyo sa produktong petrolyo nga naapektuhan sa kagubot sa Middle East, nga nakaapekto usab sa gasto sa enerhiya sa nasod.
Photo Courtesy: Paclights
