Mipanaw na ang kanhing NBA player nga si Jason Collins sa edad nga 47 human makigbisog sa sakit nga glioblastoma, usa ka klase sa agresibong cancer sa utok, sumala sa kumpirmasyon sa iyang pamilya, si Collins nailhan sa kasaysayan sa NBA isip unang aktibong lalaking atleta nga dayag nga miangkon nga siya usa ka gay, usa ka desisyon nga nakahatag og dakong epekto sa sports ug sa pagdawat sa LGBTQ+ community sa propesyonal nga basketball.
Gipadayag sa iyang pamilya nga siya nagpadayon sa pagpatambal sa Singapore pinaagi sa chemotherapy, apan wala na kini nakaluwas kaniya tungod sa pagkagrabe sa iyang kondisyon. Niadtong miaging tuig, gi-anunsiyo niya nga siya adunay cancer ug nagpadayon sa intensive nga pagpaayo.
Nagpahayag og pakikiramay si NBA Commissioner Adam Silver, nga miila sa dakong kontribusyon ni Collins sa NBA ug sa iyang importansya isip usa ka inspirasyon sa daghang tawo.
Si Collins, nga gikan sa California, nagdula sa unom ka NBA teams sulod sa 13 ka tuig, nga nagsugod sa New Jersey Nets. Niadtong 2013, iyang giangkon ang iyang sexual orientation, ug sa samang tuig naapil siya sa Time Magazine’s 100 Most Influential People sa kalibutan.
Ang iyang kinabuhi ug karera magpabilin nga simbolo sa kaisog, pagkamatinud-anon, ug pagdawat sa pagkatawo sa usa ka tawo.
Photo Courtesy: NBA
