Nisikat sa Spain niadtong 2010 ang istorya sa usa ka babaye nga si Ángeles Durán human niya giangkon nga iya kuno ang Adlaw pinaagi sa pagparehistro niini sa usa ka notaryo.
Matod pa kaniya, wala klaro sa pipila ka balaod kung pwede ba o dili ang usa ka indibidwal nga moangkon og celestial bodies sama sa Adlaw, mao nga iyang gisulayan nga ipaagi kini sa legal nga proseso.
Apan, sumala sa internasyonal nga kasabutan nga Outer Space Treaty, dili mahimong angkonon sa bisan kinsa o bisan unsang nasud ang mga butang sa kalawakan. Tungod niini, wala giila sa legal nga aspeto ang iyang claim.
Bisan pa niini, nahimong sentro sa diskusyon online ang maong isyu kabahin sa limitasyon sa balaod, konsepto sa pagpanag-iya, ug unsaon pag-atubang sa katilingban sa mga talagsaong ideya nga mosulay sa kasamtangang sistema.
