Nagpagawas ang DOST-PAGASA og El Niño Alert niadtong Abril 22, 2026, subay sa datos sa human sa ilang pagmonitor sa kondisyon sa Tropical Pacific nga nagpabilin pa sa ENSO-neutral o wala pa’y dominanteng El Niño nga kahimtang.
Kini ang gibutyag sa PDRRMO Davao De Oro pinaagi ni Jules Earl Gazmen- LDRRMO III atol sa pagkihinabi sa Juander Radyo News Team Gahapong adlawa. Matod pa nga adunay 79% chance El Niño nga kondisyon sa panahon sugod sa Hunyo, Hulyo, hangtod Agosto, ug posibleng magpadayon kini hangtod sa sayong bahin sa 2027.
Gilauman sa mga eksperto nga mahimong maapektuhan ang lain-laing sektor kung molala ang El Niño. Lakip niini ang taas nga temperatura nga mahimo pa nga motaas gikan sa kasamtangang heat index nga 32°C hangtod 40°C o labaw pa.
Posible usab ang prolonged dry season nga mahimong hinungdan sa kakulang sa tubig, pagkunhod sa produksyon sa agrikultura, ug mas taas nga risgo sa wildfire incidents.
Dugang pa, gilauman usab ang pagtaas sa konsumo sa kuryente tungod sa kainit, ug ang pagkunhod sa lebel sa tubig sa mga dam, nga makaapekto sa suplay sa tubig ug irigasyon.
Ang PDRRMO Davao de Oro nag-awhag sa publiko nga mag-andam daan batok sa posibleng epekto sa El Niño, ilabi na sa posibleng kakulang sa tubig, grabeng kainit, ug epekto sa agrikultura og gidasig nga magtipig og tubig, likayan ang diretsong exposure sa kainit, ug sundon ang mga pahimangno sa mga lokal nga awtoridad ug PAGASA updates aron malikayan ang disgrasya ug kadaot.
