Gipadayag sa Land Transportation Franchising and Regulatory Board (LTFRB) Region 9 nga andam na ang ilang buhatan sa pagpatuman sa fuel subsidy program karong semanaha alang sa kapin dos mil ka mga public utility vehicle o PUV drivers sa rehiyon.
Matod ni LTFRB Regional Director Tommy “Tanjie” Macadindang nga 100 porsyento nang andam ang ilang listahan sa mga public utility vehicle nga modawat og subsidy card gikan sa bangko.
Sumala ni Macadindang ang maong programa gitumong aron matabangan ang mga driver sa jeepney, bus ug van nga namasahero nga naapektuhan sa pagsaka sa presyo sa krudo ug gasolina.
Dugang pa ni Macadindang nga base sa ilang masterlist, kapin dos mil ka PUV drivers sa rehiyon ang gilauman nga makabenepisyo sa maong programa.
Matod sa opisyal, nga pinaagi sa fuel subsidy, makadawat og pinansyal nga tabang ang mga kwalipikadong PUV drivers sa kantidad nga Php5,000.
Ang maong ayuda ihatag ngadto sa operator diin nakapangalan ang prangkisa aron makatabang sa gasto sa gasolina o diesel samtang nagpadayon sila sa pagserbisyo sa katawhan.
