Nagkantidad og ₱1.2 milyones nga repair ug renovation sa Persons with Disability Affairs Office (PDAO) ang hapit na mahuman, sumala sa gipadayag ni Conchita Areola, PDAO Head.
Matod ni Areola, dugay na nilang gipaabot ang pag-ayo sa ilang opisina nga kaniadto pirming mabahaan ug wala dayon matagad. Apan pinaagi sa suporta ni Frederick Siao, Mayor sa syudad, nahatagan na kini og prayoridad ug karon hapit na matapos ang pag-ayo sa pasilidad.
Sa pagkakaron, temporaryong nag-operate ang PDAO sa Office of Senior Citizens Affairs (OSCA) nga nahimutang sa Zone 2B, Barangay Del Carmen aron mapadayon gihapon ang ilang serbisyo sama sa pagproseso sa PWD Identification Card ug uban pang panginahanglan sa mga Persons with Disability (PWD).
Samtang niini, niadtong Pebrero 4 hangtod 6, 2026, nagpahigayon usab ang PDAO og three-year development planning alang sa sektor sa PWD aron mapalambo pa ang ilang mga programa ug serbisyo.
Bisan pa sa epekto sa bagyo nga Tropical Storm Basyang, nagpadayon gihapon ang opisina sa pagmonitor sa mga PWD nga naapektuhan sa baha.
Miaging semana usab, nagpahigayon ang PDAO og one-stop shop sa Robinsons Place Iligan aron matabangan ang mga PWD nga nawala ang ilang ID ug booklet. Libre ug walay bayad ang pagkuha pag-usab niini ug dili na kinahanglan ang affidavit of loss.
Sumala sa datos sa opisina, 56 ka PWD ang naka-avail sa bag-ong ID samtang 96 ka booklet ang gilayon og hatag sa maong serbisyo.
Photo Courtesy: PDAO ILIGAN
