Patay ang usa ka 27-anyos nga lalaki samtang tulo pa ang naangol human sa maaksidente ang motorsiklo nga gisakyan, nga nahitabo niadtong nakalabay nga adlaw sa Barangay Capisan, Tabina, Zamboanga del Sur.
Base sa imbestigasyon sa kapulisan, ang mga biktima nga naangol mao ang 17-anyos, 14-anyos ug 24-anyos, samtang ang biktima nga nakabsan sa kinabuhi nagpangidaron ug 27-anyos, diin silang tanan pulos residente sa Tabina, Zamboanga del Sur.
Nasayran sa imbestigasyon nga gikan ang mga biktima sa usa ka birthday celebration sa Barangay Abong-abong diin matod pa nakainom sila og ilimnong makahubog, og padulong unta sa usa ka disco party sa Barangay Limbayan sa lungsod sa Pitogo sakay sa usa ka Rusi 125 nga motorsiklo.
Samtang nagbiyahe sa Barangay Capisan, giingong adunay insekto nga misulod sa mata sa drayber nga maoy hinungdan nga nawala ang kontrol sa manibela hinungdan mibangga ang gimanihoang motor, sa nagpundok nga kahoy sa pikas linya hinungdan sa aksidente.
Daling gidala sa balay tambalanan ang mga biktima, apan walay swerteng gibawian sa hinulamang kinabuhi ang drayber ug gidala na kini sa pamilya ngadto sa ilang panimalay sa Barangay Abong-abong, Tabina, Zamboanga del Sur, samtang ang mga naangol nga mga biktima padayong nagpaalim sa balay tambalan.
Sa kasamtangan padayon ang imbestigasyon sa kapulisan sa Tabina Municipal Police Station kabahin sa maong panghitabo.
Photo Courtesy: Patch
