Gipahibalo sa lokal nga kagamhanan sa dakbayan sa Iligan pinaagi sa buhatan sa Iligan City Traffic Parking and Management Office (ICTPMO) nga ipadayon nila ang pagpatuman sa mandatory road safety measures ug lain-laing intervention aron mapakunhod ang mga aksidente sa kadalanan.
Bisan pa man nga limitado pa ang detalyado nga updates bahin sa mga pagbag-o sa speed limits alang sa tuig 2026, klaro nga ang pagpahigayon kabahin gihapon sa mas lapad nga strategy sa trapiko ug road management sa syudad.
Gipahimangnoan ang tanan nga mga motorista nga magpadayon sa pag-obserbar sa kasamtangang speed limits nga gipahimutang sa Iligan City ubos sa New Traffic Code (Ordinance No. 02-4256).
Sumala kang Ralph Oblenda, Head sa ICTPMO), padayon nilang gitan-aw ug nagplano sa mas hugot nga pagpatuman sa speed limits ug sa tanang road safety measures, isip kabahin sa mas lapad nga mga inisyatibo sa peace and order.
Dugang pa ni Oblenda, ang ICTPMO sa pagkakaron naghulat pa usab sa budget alang sa pagpalit og accurate speed gun, nga gamiton sa estrikto ug episyenteng pagpatuman sa speed limits sa dakbayan.
Photo Courtesy : City Government of iligan
