Giluwatan ni Social Worker Officer IV Jennifer Sanggoyod City Social Welfare and Development (CSWD) nga usa ka 6 ka bulan nga bata ang apil sa mga nabiktima sa Online Sexual Abuse and Exploitation of Children (OSAEC) sa dakbayan sa Iligan atol sa eksklusibong interview sa Juander Radyo News team.
Matod ni Sanggoyod, dako ang papel sa CSWD sa pag-atiman sa mga bata human sa rescue operations. Ilang gihatagan ang mga biktima og shelter, medical ug legal assistance, mental health services, referral sa edukasyon ug espiritwal nga suporta isip kabahin sa aftercare services.
Gipadayag usab nga adunay mga kaso nga kaugalingong pamilya sa bata ang mahimong perpetrator, bisan pa unta sila ang angay mag-amuma ug moprotekta sa mga kabataan.
Sa higayon nga mapasakaan og kaso ang suspek, magpatuman ang CSWD og capability assessment aron mahibal-an kung kinsa nga kaliwat sa pamilya ang angay modawat sa bata. Ang maong proseso mahimong molungtad og 6 ka bulan hangtod duha ka tuig.
Sa rekord sa CSWD, gikan Enero hangtod Disyembre 2025, mokabat sa 78 ka bata sa Iligan ang nabiktima sa sekswal nga pagpangabuso. Nagpadayon usab ang lig-on nga pakigtambayayong sa CSWD ug mga barangay officials sa dakbayan aron mapugngan ang maong krimen ug mapanalipdan ang mga bata.
Sa mensahe ni Sanggoyod, gi-awhag niya ang mga ginikanan nga bantayan ug protektahan ang ilang mga anak batok sa online exploitation.
Photo Courtesy : City Government of iligan
