Gipatuman karong adlawa, Martes, Marso 9, 2026 ang temporaryong pagpatuman sa ‘Compressed Work Schedule’ ug mandatoryong mga lakang sa pagdaginot sa kuryente sa tanang opisina sa probinsyal nga gobyerno sa Zamboanga del Norte pinaagi sa gipagawas nga Executive Order No.16, Series of 2026, si Gov. Darel T. Uy.
Tumong niini nga mapakunhod ang konsumo sa kuryente ug gasolina samtang gisiguro ang padayon nga paghatag sa mga serbisyo sa publiko taliwala sa pagsaka sa presyo sa lana sa kalibutan nga may kalabotan sa nagpadayon nga krisis sa Middle East.
Sugod sa karong adlawa, ang mga empleyado sa probinsyal nga gobyerno moadaptar ngadto sa temporaryong ‘compressed work week’. Bisan pa niini, ang mga opisina PGZN magpabiling abli sa publiko gikan Lunes hangtod Biyernes, apan ang mga empleyado mosulod lamang og upat ka adlaw matag semana.
Ang matag departamento mahimong mopili kung Lunes hangtod Huwebes o Martes hangtod Biyernes ang iskedyul sa trabaho depende sa panginahanglan sa operasyon nga tukion sa mga department head.
Ubos sa bag-ong iskedyul, ang oras sa trabaho magsugod alas 7:00 sa buntag hangtod alas 6:00 sa gabii, uban sa usa ka oras nga lunch break, aron masunod ang 40-oras nga workweek nga gikinahanglan sa Civil Service Commission.
Ang mga opisina nga naghatag og essential ug frontline services magpadayon sa ilang normal nga operasyon aron masiguro ang walay hunong nga pagserbisyo sa publiko. Apil niini ang Zamboanga del Norte Medical Center, tanang district hospitals ug infirmaries, ingon man ang mga public safety ug security units nga magpadayon sa ilang regular nga lima ka adlaw nga trabaho matag semana o 24/7 nga operasyon.
Gimando usab sa E.O. nga ang tanang departamento ug satellite offices sa probinsyal nga gobyerno magpakunhod sa konsumo sa kuryente ug gasolina og 10 porsyento hangtod 20 porsyento.
Kabahin sa mga lakang sa daginot sa kuryente ang pagmintinar sa temperatura sa air-conditioning units sa 24°C. Ang mga dili importante nga suga ug electronic equipment kinahanglan palungon panahon sa lunch break ug human sa oras sa opisina, samtang ang mga gamit sa opisina sama sa computer, printer, ug copier kinahanglan ibutang sa ‘sleep mode’ kung wala gamita.
Gipadayag usab sa maong E.O. nga hunongon ang mga non-essential official travel ug study tours, team-building activities, ug dagkong mga seminar. Hinoon, ang paggamit sa online platforms alang sa mga miting ug kumperensya.
Ang Provincial General Services Office ug ang Provincial Human Resource Management Office gitahasan sa pagmonitor sa pagsunod sa maong executive order. Ang tanang departamento kinahanglan mosumite og weekly reports bahin sa ilang konsumo sa enerhiya ug paggamit sa gasolina ngadto sa Office of the Governor.
Ang maong mando magsugod karong Marso 9, 2026 ug magpabilin nga ipatuman hangtod nga matangtang ang ‘national state of urgency’ nga may kalabotan sa pagsaka sa presyo sa gasolina.
Gipasiugda sa probinsyal nga gobyerno nga ang mga lakang gituyo aron mapalambo ang responsable nga paggamit sa enerhiya samtang gisiguro ang pagpadayon sa paghatag og serbisyo sa katawhan sa tibook probinsya.
Photo Courtesy: ZN Provincial News Network
