Gitunol sa Probinsyal nga Panggamhanan sa Cotabato, ilawom sa liderato sa Probinsyal Ehekutibo ang nagkalain-laing safety gear alang sa mga miyembro sa Barangay Peacekeeping Action Team (BPAT) sa lungsod sa Kabacan kaniadtong nakalabay nga adlaw.
Gipadayag sa probinsya nga ilang giila ang sakripisyo ug dakong papel sa mga BPAT sa pagmintinar sa kalinaw ug kahapsay sa komunidad, ilabi na sa mga barangay sa Kabacan.
Nakabenepisyo sa maong distribusyon ang Barangay Cuyapon ug Barangay Kayaga. Kun asa sa Cuyapon, nadawat sa ilang BPAT og 20 ka reflective vests, 20 ka T-shirts, 10 ka iron baton, 10 ka flashlights ug 10 ka whistles. Samtang sa Kayaga, gihatagan usab og 20 ka reflective vests, 20 ka T-shirts, 10 ka iron baton, 10 ka flashlights ug 30 ka whistles.
Sumala sa lokal nga panggamhanan, kabahin kini sa Community-Based Crime Prevention program sa probinsya, nga nagtinguha sa paghatag og angay nga kagamitan sa mga BPAT samtang nagbantay sila sa ilang tagsa-tagsa ka barangay.
Photo Courtesy: LGU-Kabacan
