Tinguha sa Pilipinas nga pangulohan ang mga diskusyon sa rehiyon aron makab-ot ang usa ka hiniusang baruganan mahitungod sa US reciprocal tariffs pinaagi sa iyang pagkapangulo sa Association of Southeast Asian Nations (ASEAN), sumala sa Department of Trade and Industry (DTI).
Matod ni Trade Secretary Ma. Cristina A. Roque, ang mga taripa sa US usa sa mga hisgutanan nga tukion sa mga trade ministers sa sunod bulan. Ang mga senior economic ministers sa ASEAN mopahigayon og usa ka retreat sa Manila karong Marso 13.
Niadtong niaging semana, gipahibalo ni US President Donald J. Trump nga mopahamtang siya og bag-ong 15% nga buhis sa mga produkto nga mosulod sa US sugod niadtong Pebrero 24. Apan, gikataho nga ang US nagpahamtang na og dugang 10% nga taripa sa tanang mga produkto nga walay exemption.
Kini nga bag-ong palisiya ni Trump miabot human ang US Supreme Court mihukom nga nilapas siya sa iyang awtoridad sa dihang gipatuman niya ang reciprocal tariffs. Tungod sa hukom, nawad-an og bili ang mga taripa nga gipahamtang sa administrasyong Trump sa China, Japan, South Korea, Taiwan, ug mga ekonomiya sa ASEAN. Kadaghanan sa mga produkto nga gikan sa Pilipinas nag-atubang unta og 19% nga taripa sa US.
Bisan pa niini, matod ni Finance Secretary Frederick D. Go, anaa gihapon sa maayong kahimtang ang Pilipinas tungod kay padayon ang pakig-istorya sa mga opisyal sa US. Gipahibalo niya nga sa pagkakaron, ang kadaghanan sa mga semiconductors ug mga importanteng eksport sa agrikultura sa nasod exempted o dili maigo sa taripa.
Photo courtesy: Focus Malaysia
