Gipaambit ni Arthur Carlos Voltaire R. Rimando, Mayor sa Maco, Davao De Oro ang kamahinungdanon ug dakong papel sa EDSA People Power Revolution sa kasaysayan sa Pilipinas, atol sa pagbisita sa Juander Radyo News Team niadtong nakalabay nga adlaw.
Sumala sa mayor, ang EDSA usa kini ka “turning point” o dakong kausaban nga dili na mahimong ma-reverse. Matod pa niya, pinaagi sa maong rebolusyon, nakab-ot sa katawhang Pilipino ang tinuod nga espiritu sa demokrasya.
Gihisgutan usab niya nga sa wala pa ang EDSA, nasinati sa nasod ang gitawag niyang “labing mangitngit nga panahon,” diin daghang probisyon sa Konstitusyon ang wala na masunod o napadaplin.
Busa, alang kaniya, ang EDSA Revolution nagpabiling simbolo sa kagawasan ug gahum sa katawhan sa pagpanalipod sa demokrasya sa Pilipinas.
Gipadayag usab ni Mayor Rimando nga 100 porsyento siyang masaligon nga matuman ang bisan unsang mga plano ug pangandoy sa lungsod kung ang tanan magkahiusa. Apan iyang gipahimangnoan ang katawhan nga kon magkabahin-bahin o “disunited,” walay maayong resulta nga maabot ug masayang lamang ang panahon.
Busa, iyang giawhag ang matag usa nga dili usikan ang matag adlaw ug magtinabangay aron makab-ot ang mga tumong sa lungsod.
