Nadakpan sa hiniusang operasyon sa kapulisan ang Top 5 Municipal Level Most Wanted Person gikan sa Kabacan, North Cotabato alas 1:20 sa hapon, Pebrero 24, 2026 sa Purok Cadena De Amor, Barangay Coronon, Sta. Cruz, Davao del Sur.
Giila ang suspek nga si alyas “Sandatu” o “Dids,” 24-anyos, minyo ug residente sa Barangay Aringay, Kabacan.
Gidakop siya pinaagi sa mga warrant of arrest tungod sa paglapas sa Section 5 ug 11 sa Republic Act 9165 o Comprehensive Dangerous Drugs Act of 2002 ug kasong Attempted Rape.
Ang operasyon gipangunahan sa Davao del Sur Police Provincial Office ubos sa liderato ni Provincial Director PCOL Leo T. Ajero, kauban ang Provincial Intelligence Unit, Provincial Drug Enforcement Unit, Sta. Cruz MPS, Kabacan MPS, RID 11, PIT RID Davao del Sur ug National Intelligence Coordinating Agency Region 11.
Sumala sa kapulisan, ang warrant gi-isyu ni Honorable Alandrex M. Betoya sa Regional Trial Court Branch 16 sa Kabacan. Ang piyansa sa kasong Attempted Rape gitakda sa 120,000 pesos samtang ang drug cases alang na sa serbisyo sa sentensya.
Sa pagkakaron, anaa na sa kustodiya sa Sta. Cruz Municipal Police Station ang akusado alang sa hustong disposisyon.
