Gipahibalo ni City Veterinarian Dr. Eugene Gornez ang mga timailhan sa rabies sa mga binuhing hayop hilabi na sa mga iro. Sumala pa, usa sa unang sintomas mao ang kalit nga pagbag-o sa kinaiya sa binuhing hayop.
Ang iro nga dili agresibo mahimong mamahimong agresibo, magsige og kitkit sa kulungan ug maglugnot sa ilang pisi ug posible usab nga dili moinom og tubig ug molikay kung pahanginan.
Tungod niini, hugot nga nagpahimangno ang City Veterinarian sa katawhan nga dili magkumpyansa kon adunay kahayupan nga nagpakita og susamang mga sintomas.
Kinahanglan matud pa nga likayan ang pagduol o paghikap niini ug dayong kontakon ang City Veterinary Office aron sila na ang mohimo sa hustong pagdakop ug pag-atiman sa maong hayop.
