Gi-relieve na sa pwesto ang usa ka police personnel sa Pagadian City Police Station human mi-viral sa social media ang wala niya pagtahod sa Lto enforcer ug misibat pa sa checkpoint niadtong nakalabay nga adlaw, sa syudad sa Pagadian.
Sa pakighinabi sa Juander Radyo News Team kang PCol. Bonifacio Arañas Jr. ang Provincial Director sa Zamboanga del Sur Police Provincial Office (ZSPPO), gibutyag niini human sa insidente gilayon siyang miisyu og relieved order sa nalambigit nga pulis og gibutang sa Personnel Holding and Accounting Section (PHAS) samtang ginahimo ang pormal nga imbestigasyon sa NAPOLCOM-9.
Segon pa ni PD Arañas, ang pag-relieve sa personnel wala nagpasabot nga napamatud-an na nga siya sad-an , kondili usa kini ka preventive measure aron masiguro ang patas ug walay pagpanghilabot nga pag-imbestiga sa nahitabo.
Nagpahinumdom usab ang Provincial Director ngadto sa mga opisyal ug tanang miyembro sa kapulisan sa Zamboanga del Sur nga mahimong ehemplo sa pagsunod sa balaod, ilabi na sa mga operasyon nga gipahigayon sa ubang ahensya sa gobyerno.
