Gipahimangnoan ang publiko sa pag-amping batok sa leptospirosis samtang nagpadayon ang kusog nga ulan ug pagbaha sa nagkalain-laing lugar sa Tagum City.
Sumala sa City health authorities, importante nga masayran sa katawhan ang hustong impormasyon kabahin sa maong sakit aron maprotektahan ang kaugalingon ug pamilya ilabi na karong ting-ulan.
Gipatin-aw nga sukwahi sa gituohan sa kadaghanan, ang bakterya nga hinungdan sa leptospirosis dili lamang gikan sa ihi sa ilaga. Mahimo usab kini makuha gikan sa ihi sa ubang hayop sama sa iro, baka, ug baboy nga mahimong makontamina sa tubig baha ug yuta.
Usa ka sakit ang leptospirosis nga makuha kung ang kontaminadong tubig o yuta makasulod sa lawas pinaagi sa samad sa panit, mata, ilong, o baba.
Lakip sa mga sintomas niini ang hilanat, sakit sa ulo, kasakit sa kaunoran, pamula sa mata, pagsuka, ug kaluya. Sa mas grabeng kahimtang, mahimo kini mosangpot sa kadaot sa kidney ug atay, ug mahimong makamatay kung dili matambalan dayon.
Gina-awhag ang publiko nga maglikay sa paglusong sa baha kung dili kinahanglan, magsul-ob og botas ug proteksyon kung adunay lakaw sa baha, ug siguruhon ang kahinlo sa lawas human ma-expose sa kontaminadong tubig.
Gipasiugda usab sa mga otoridad nga importante ang dali nga pagpangayo og medikal nga tabang kung makasinati og mga sintomas aron malikayan ang grabeng komplikasyon sa giingong sakit.
Photo courtersy : Aditya Birla Capital
