Gipahibalo mismo ni Coco Martin nga matapos na ang iyang gi-bidahang primetime series nga FPJ’s Batang Quiapo sa Marso 13, 2026. Gawas sa pag-arte, siya usab ang co-writer, co-producer ug co-director sa action drama nga unang nipasalida niadtong Pebrero 13, 2023.
Sa interbyu ni MJ Felipe nga napakita sa TV Patrol, gipamatud-an ni Coco ang desisyon nga tapuson ang serye. Matod niya, nabati na niya nga nahuman na sa karakter ni Tanggol ang daghang parte sa iyang istorya.
Giingon usab sa aktor nga lisod kaayo ang maong desisyon tungod kay mahal niya ang programa ug emosyonal siya matag adunay karakter nga mo-exit sa istorya. Nagpasalamat siya sa tanang viewers nga nagpadayon sa pagsuporta sulod sa halos tulo ka tuig.
Gisaad ni Coco nga dili malimtan sa mga manan-aw ang katapusang tulo ka semana sa serye tungod sa daghang eksena ug importante nga mga panghitabo. Daghan usab ang na-intriga sa iyang sunod nga proyekto human sa Batang Quiapo, nga posibleng iyang ipahibalo sa umaabot.
Photo courtesy: Ang Probinsyano wikia- Fandom
