Sikop ang tulo ka mga indidbidwal ug nabungkag ang drug den human sa gipahigayong Search Warrant Implementation sa Purok Kamonggay, Barangay Galas, Dipolog City, Zamboanga Del Norte niadtong nakalabay nga adlaw.
Ang mga dinakpan naglangkob sa 31-anyos nga porter, 36-anyos nga driver, ug 30-anyos nga construction worker, pulos mga lalaki ug parehong residente sa nasangpit nga dapit kinsa pulos nalista isip High Value Individual.
Nasakmit gikan sa mga dinakpan ang 15 ka mga dagkong pakete sa shabu nga motimbang ug 14 grams ug nagkantidad ug Php95,200.00, 1 roll ug 14 strips sa aluminum foil, 4 ka disposable lighters, 1 ka red pouch ug uban pang mga non-drug items.
Gilusad ang maong operasyon sa pagpanguna sa mga personahe sa Dipolog City Police Station kauban ang Philippine Drug Enforcement Agency (PDEA) Zamboanga del Norte Provincial Office, RDEU 9, ug 1st ZNPMFC.
Balhog sa selda sa Dipolog City Police Station ang tulo ka mga dinakpan ug mag-atubang sa kasong paglapas sa RA 9165 kon Comprehensive Dangerous Drugs Act of 2002.
