Nasamdan ang duha ka menor de edad sa usa ka aksidente nga nahitabo niadtong nakalabay nga adlaw sa Barangay San Vicente Ruparan Digos City. Sumala sa mga saksi, sakay ang duha sa usa ka NMAX nga motorsiklo ug giingong nagpadagan og kusog sa maong lugar.
Pag-abot sa kurbada, kalit nga nawad-an og kontrol ang drayber hinungdan nga midiretso ang motorsiklo sa daplin sa dalan ug mibangga sa usa ka payag.
Tungod sa kusog nga impact, natagak ang duha sa kilid sa kalsada ug gituohang adunay nabali nga parte sa lawas ang drayber samtang adunay samad usab ang angkas niini.
Daling miresponde ang mga personahe sa City Disaster Risk Reduction and Management Council (CDRRMC) aron mahatagan og unang tabang ang mga biktima ug madala sa ospital alang sa dugang nga medikal nga atensyon.
Padayon pa ang imbestigasyon sa mga awtoridad aron matino ang eksaktong hinungdan sa aksidente.
