Temporaryong gipasira sa lokal nga panggamhanan sa syudad sa Tandag ang Mahayag Beach Resort sa Barangay Buenavista, Tandag City human sa aksidente sa pagkalunod sa usa ka foreign national niadtong miaging semana.
Gipagawas ni Tandag City Mayor Roxanne Pimentel ang usa ka executive order nga nagmando sa diha-diha nga pagsira sa resort samtang ginahimo ang komprehensibong imbestigasyon, safety verification, ug pagtan-aw sa pagsunod sa mga regulasyon sa lokal nga panggamhanan.
Sumala sa report, nalumos ang biktima samtang naligo sa dagat sulod sa resort niadtong Pebrero 13, 2026. Narekober ang lawas sa biktima sa sunod adlaw, Pebrero 14, 2026. Sa inisyal nga imbestigasyon sa mga awtoridad, giingong kusog ang balod ug sea current niadtong panahona nga nagpameligro sa mga naligo.
Gibutyag usab nga ang preventive temporary closure sa mga establisyemento nga posibleng magbutang og hulga sa kaluwasan sa publiko usa ka balido nga paggamit sa local police power sa lokal nga panggamhanan.
Gimugna na usab ang usa ka joint inspection team aron mag-imbestiga sa insidente. Lakip sa team ang mga representante gikan sa Business Permits and Licensing Division ug City Tourism Division sa opisina sa mayor, Tandag City Police Station, City Health Office, City Disaster Risk Reduction and Management Office (CDRRMO), ug mga opisyal sa Barangay Buenavista.
Sumala sa executive order, mobalik lamang ang operasyon sa resort kon mahuman na ang imbestigasyon, mapamatud-an ang pagsunod sa mga safety, sanitation, regulatory, ug operational requirements, ug makakuha na kini og clearance gikan sa city government.
