Mokabat sa Php100-m nga rubberized track oval, ang planong tukuron sa Province of Dinagat Island (PDI), isip dakong pamuhunan sa panglawas ug kalamboan sa komunidad.
Ang maong rubberized track oval tukoron isip kabahin sa Dinagat Islands Sports Complex, nga maglangkob sa 400-meter track isip fitness stations.
Sa usa ka pulong niadtong Pebrero 10, 2026, sa Governor kauban ang Board Member og mga kawani niini, gihisgutan og gipalig-on ang mga lakang ug koordinasyon padulong sa aktuwal nga pagpatuman sa proyekto.
Matod pa sa mga opisyal, dugay nang nag-atubang ang probinsya sa kakulangan sa standard nga athletics facility, nga nakaapekto sa youth development, physical education, ug organisadong sports programs. Pinaagi sa maong pasilidad, gilauman nga matubag na ang dugay nang panginahanglan sa mga estudyante, atleta, ug sa tibuok komunidad.
Gilauman usab nga magsilbi kining venue sa inter-school, provincial, ug regional athletic meets, nga makatampo sa pagpalambo sa lokal nga ekonomiya ug turismo. Lakip sa mga benepisyo ang pagpalig-on sa aktibong panglawas, talent development sa kabatan-onan, ug mas lig-ong community engagement.
Ang lig-ong koordinasyon tali sa probinsyal ug nasyonal nga liderato naghatag og klarong direksyon sa pagpatukod sa track oval usa ka timaan sa seryosong paningkamot sa pamunuan sa Dinagat Islands sa pagpalambo sa sports, panglawas, ug talento sa kabatan-onan.
